Депутатлар Сарай-Чокырча тимер юл разъездын бетерү һәм Арча районы чикләрен билгеләү турындагы республика законына үзгәрешләр кертү, шулай ук республика законнарына үзгәрешләр кертү турындагы закон проектларын карадылар. Утырышны Дәүләт корылышы һәм җирле үзидарә комитеты рәисе Альберт Хәбибуллин үткәрде.

Арча район Советының юридик бүлеге җитәкчесе Ләйсән Сәгыйтова билгеләп үткәнчә, «Сеҗе-Арча» төбәк әһәмиятендәге юлдан якынча 3,5 чакрым ераклыкта урнашкан Сарай-Чокырча тимер юл разъезы (Урта Курса авыл җирлеге составында) үз эшен туктаткан. Хәзерге вакытта биредә тимер юл һәм Чокырча тукталыш платформасы гына урнашкан, йортлар һәм башка корылмалар инде юк. Торак пункт территориясендә шулай ук электр тапшыру линияләре терәкләре, үзәкләштерелгән су белән тәэмин итү, су агызу, газ белән тәэмин итү юк, җирле әһәмияттәге юллар категориясенә кертелгән Түбән Курса торак пунктына кадәр юл бар. Социаль объектлар, мәдәни мирас объектлары да юк.

"Россия Эчке эшләр министрлыгының Арча районы буенча бүлеге мәгълүматлары буенча, торак пунктында теркәлгән кешеләр юк. Моны исәпкә алып, Сарай-Чокырча тимер юл разъезы торак пункт билгеләрен югалткан, асылда эшләми һәм киләчәктә дә үсеш перспективалары юк. Фикер алышу нәтиҗәләре буенча Урта Курса авыл җирлеге халкы торак пунктны бетерү инициативасын хуплады", – диде Ләйсән Сәгыйтова.

Шул ук вакытта тукталыш платформасы гамәлдә кала.

Бүген үк комитет утырышында республиканың аерым закон актларына үзгәрешләр кертү мәсьәләсе каралды. Әлеге закон проектын әзерләү Татарстан Сайлау кодексын, «Татарстан Республикасы Референдумы турында» һәм «Җирле референдум турында» законнарны федераль законнарга туры китерү зарурлыгына бәйле.

Закон проекты белән үзгәрешләр кертелә, алар нигезендә сайлаучылар, референдумда катнашучылар турында белешмәләр төзү һәм төгәлләштерү буенча муниципаль районның, шәһәр округының җирле администрациясе башлыгының бурычы төшереп калдырыла. Әлеге белешмәләр сайлаучыларны, референдумда катнашучыларны дәүләт теркәве системасыннан – сайлаучылар, референдумда катнашучылар турында белешмәләр булган үзәкләштерелгән мәгълүмат ресурсыннан (сайлаучылар, референдумда катнашучылар регистры) файдаланып төзеләчәк, ул реаль вакыт режимында төгәлләштерелә.

Закон проектында шулай ук тавыш бирү йомгаклары турында беркетмәләрне һәм җыелма таблицаларны электрон рәвештә төзү мөмкинлеге беркетелә. Шул ук вакытта тавыш бирү йомгаклары турындагы беркетмәләрне һәм җыелма таблицаларны кәгазь чыганакларда рәсмиләштерү процедурасы саклана.