Ол жеке парақшасындағы тікелей эфирде оқырмандарымен ене мен келін арасындағы қарым-қатынас туралы әңгіме өрбітті. Қыз-келіншектердің басым көпшілігі енелерін жамандап кеткеніне шыдамаған айтыскер ақын терме орындап берді.

“Қарамай кетсең анаға,

Қаларсың босқа табаға.

Әкенің көңілін қалдырған,

Баланың жолы бола ма?!

Ененің сағын сындырған,

Келіннің бағы жана ма?!

Келінді кейін сорлатар

Ішінен шыққан бала да”, – термеден үзінді орындады.

Айтыскер ақынның айтуынша, қазақтың халық ауыз әдебиетінің кез келгенінен психологиялық кеңес табуға болады.

“Бұл терме де инсайтқа толып тұр. Ене де – ана. Біз бүгінгі өмірді ғана айтамыз. Болашағымыз қандай тосынсый дайындап тұрғанын білмейміз. Дәл қазір көп келіншек енелерін жамандап отыр. Ертең өздері қандай ене болады, қандай келін алады, сол туралы ойламайды. Жастық шағың көзді ашып-жұмғанша өте шығады. Келін немереңнің тырнағына да зар қылып қоймауына кім кепіл?!. Сол кезде тырнақ тістеп, опық жеп қалмаңдар! Ол уақытта ештеңені өзгерте алмайсың. Сыйлайын десең ене өліп қалған, бала қатынымен кетіп қалған, екі ортада тентіреп өзің қаласың. Сондықтан, үлкенді сыйлау – психологияның атасы”, – деп сөзін аяқтады.

Эфир көріп отырғандардың пікірі екіге жарылды. Бірі “өмір – бумеранг” екенін еске салды десе, екіншісі “енемнен көңілім қалған, мына термеңіз онша әсер етпейді” деп шындығын айтып жатыр. Бірі айтыскер ақынның өзіне бас салды. “Өзің қанша ене тастадың”, “Күйеуіңнің санынан жаңылдық” деп сынап жатқандар да жоқ емес.

Айта кетейік, айтыскер ақын былтыр келін түсіріп, биыл әже атанғанын сүйіншілеген болатынбыз.